ಚಪ್ಪಾಳೆಯ ತಾಳದಲ್ಲಿ ಮನುಷ್ಯನ ಸ್ವಾಭಾವಿಕ ಸಮ್ಮಿಲನ
ಒಬ್ಬ ಕಲಾವಿದನಿಗೆ ಪ್ರೇಕ್ಷಕರ ಚಪ್ಪಾಳೆಯೇ ದೊಡ್ಡ ಬಿರುದು. ಚಪ್ಪಾಳೆ ಮನುಷ್ಯನ ಸಹಜ ಕ್ರಿಯೆ. ಚಪ್ಪಾಳೆ ಮೆಚ್ಚುಗೆ, ಪ್ರಶಂಸೆಯ ಸೂಚಕ. ಗಂಡು, ಹೆಣ್ಣು, ಬಡವ, ಸಿರಿವಂತ, ರೈತ, ಕಾರ್ಮಿಕ… ಎಲ್ಲರ ಚಪ್ಪಾಳೆಯ ಸದ್ದೂ ಒಂದೇ. ಪ್ರೇಕ್ಷಕರು ಗುಂಪು ಕೈಸನ್ನೆ ಮಾಡಿ ಒಂದೇ ರೀತಿಯ ಮೆಚ್ಚುಗೆ ತಿಳಿಸಲು ಸಾಧ್ಯವಿಲ್ಲ. ಚಪ್ಪಾಳೆಯ ಬದಲು ಚಿಟಿಕೆ ಹೊಡೆಯೋಣವೆಂದರೆ ಎಲ್ಲರಿಗೂ ಚಿಟಿಕೆ ಹೊಡೆಯಲೂ ಬರುವುದಿಲ್ಲ. ಕಾಲುಗಳನ್ನು ನೆಲಕ್ಕೆ ಬಡಿಯುವುದು ಅಥವಾ ವಸ್ತುಗಳನ್ನು ಬಳಸಿಕೊಂಡು ಶಬ್ದ ಮಾಡುವುದಕ್ಕಿಂತ ಚಪ್ಪಾಳೆ ಹೊಡೆಯುವುದು ಬಹಳ ಸುಲಭದ ಕೆಲಸ. ಒಬ್ಬ ಸಾಮಾನ್ಯ ಮನುಷ್ಯನ ಚಪ್ಪಾಳೆ ತಾಳ 1 ಸೆಕೆಂಡಿಗೆ 2ರಿಂದ 5 ಚಪ್ಪಾಳೆಗಳಿರುತ್ತವಂತೆ. ಈ ಚಪ್ಪಾಳೆಯ ಫ್ರೀಕ್ವೆನ್ಸಿ 2200ರಿಂದ 2800 Hz ತನಕ ಇರುತ್ತದೆ.
ನಮ್ಮ ಕೈ ಬೇರೆಬೇರೆ ಭಂಗಿಯಲ್ಲಿ ಒಂದುಗೂಡಿದಾಗ ಬೇರೆಬೇರೆ ರೀತಿಯ ಶಬ್ದ ಹೊಮ್ಮುತ್ತದಾದರೂ, ಚಪ್ಪಾಳೆಯಿಂದ ನಮಗೆ ಸಪ್ತಸ್ವರ ರೂಪಿಸಲಾಗದು. ಸಂಗೀತ ವಾದನವಾಗಿ ಚಪ್ಪಾಳೆಯನ್ನು ಬಳಸಲೂ ಸಾಧ್ಯವಾಗದು. ಒಂದು ಹಾರ್ಮೋನಿಯಂ ಅಥವಾ ಒಂದು ವಯೊಲಿನ್ ರೀತಿಯ ತರ ಚಪ್ಪಾಳೆಯನ್ನು ರಾಗವಾಗಿಸುವುದೂ ಅಸಾಧ್ಯ. ರಾಗವಿಲ್ಲದ ಶಬ್ದ ಕರ್ಕಶಸದ್ದೇ ಆದರೂ ಚಪ್ಪಾಳೆಗಳು ಮಾತ್ರ ನಮ್ಮ ಹೃದಯಕ್ಕೆ ಹತ್ತಿರ. ಹಿಂದಿನಿಂದಲೂ ಮನುಷ್ಯನ ಉತ್ಸಾಹ ಹೊರಹೊಮ್ಮುವ ಪ್ರತಿಕ್ರಿಯೆ ಚಪ್ಪಾಳೆಯಾಗಿದೆ. ಇದು ನೈಸರ್ಗಿಕವಾಗಿ ಒಬ್ಬರ ವೈಯಕ್ತಿಕ ಭಾವನೆ ಮೇಲೆ ಆಧಾರಿತವಾಗಿದೆ. ಹಾಗಾದರೆ ಈ ಚಪ್ಪಾಳೆ ತಟ್ಟುವುದು ಗುಂಪಿನ ಕ್ರಿಯೆ ಆಗಿರುವುದು ಹೇಗೆ? ಕೆಲವೊಮ್ಮೆ ಸಮಾರಂಭಗಳಲ್ಲಿ ಮನಸ್ಸಿಲ್ಲದಿದ್ದರೂ ಚಪ್ಪಾಳೆ ಹೊಡೆಯಲೇಬೇಕು ಎಂಬ ಒತ್ತಾಯ ಹೇಗೆ ಮೂಡುತ್ತದೆ? ಸೂಕ್ಷ್ಮವಾಗಿ ನೋಡಿದಾಗ, ಒಂದು ಸಮಾರಂಭದಲ್ಲಿ ಕೆಲವು ಜನರು ಚಪ್ಪಾಳೆ ಹೊಡೆಯಲು ಶುರು ಮಾಡುತ್ತಾರೆ. ಅವರ ಚಪ್ಪಾಳೆಯ ತಾಳಗಳು ಕೂಡ ಒಂದಾಗಿರುವುದಿಲ್ಲ. ನಂತರ ಅಲ್ಲಿ ಸೇರಿರುವ ಎಲ್ಲರೂ ಅವರವರ ತಾಳದಲ್ಲಿ ಚಪ್ಪಾಳೆ ಹೊಡೆಯಲು ಆರಂಭಿಸುತ್ತಾರೆ. ಹಾಗೆ ಕೆಲವು ಸೆಕೆಂಡುಗಳಲ್ಲೇ ಇಡೀ ಸಭಾಂಗಣ ಒಂದೇ ತಾಳದಲ್ಲಿ ಚಪ್ಪಾಳೆ ಹೊಡೆಯಲು ಆರಂಭಿಸುತ್ತಾರೆ. ಇದನ್ನು ಕೇಳಲು ಕರ್ಕಶವಾಗಿರುವುದಿಲ್ಲ. ಒಂದು ಸಂಶೋಧನೆಯಲ್ಲಿ ಪ್ರಕಟಗೊಂಡಂತೆ ಗುಂಪಿನಲ್ಲಿ ಬರುವ ಚಪ್ಪಾಳೆ ಒಬ್ಬನ ವೈಯಕ್ತಿಕ ಅಭಿಪ್ರಾಯಕ್ಕಿಂತ ಹೆಚ್ಚಾಗಿ ಗುಂಪಿನ ಒಗ್ಗೂಡಿದ ಧ್ವನಿಯನ್ನು ತಿಳಿಸುತ್ತದೆ. ಭೌತಶಾಸ್ತ್ರದಲ್ಲಿ ಇದಕ್ಕೆ spontaneous order ಎಂದು ಕರೆಯುತ್ತಾರೆ.
ಇದನ್ನೂ ಓದಿ:ಆವಿಯಾದವರ ಕಥೆ ಹೇಳಲೇನು…
ಥರ್ಮೋಡೈನಾಮಿಕ್ಸಿನ ಎರಡನೇ ಸಿದ್ಧಾಂತದ ಪ್ರಕಾರ, ಈ ಭೂಮಿಯ ಮೇಲೆ ಎಲ್ಲವೂ disorder ಅಂದರೆ ಕ್ರಮವನ್ನು ಕಳೆದುಕೊಳ್ಳುವ ಮಾರ್ಗದಲ್ಲೇ ಇರುತ್ತದೆ. ಉದಾಹರಣೆಗೆ, ಒಂದು ಗೋಡೆಯಿಂದ ಕೆಳಗೆ ಬಿದ್ದು ಚೂರಾದ ಕನ್ನಡಿ ಮತ್ತೆ ಅದಾಗಿಯೇ ಜೋಡಣೆಗೊಂಡು ತನ್ನ ನಿಜ ರೂಪಕ್ಕೆ ಬರಲು ಅಸಾಧ್ಯ. ಸರಳವಾಗಿ ಹೇಳುವುದಾದರೆ ಹೀಗೆ ನಾವು ಯಾವುದೇ ಒಂದು ನೈಸರ್ಗಿಕ ಸ್ಥಿತಿ ಕಂಡರೂ ಅದು ಎಂದಿಗೂ ತನ್ನ ಮುಂಚಿನ ನಿಜ ಸ್ಥಿತಿಗೆ ಬರಲು ಅಸಾಧ್ಯ. ಸಮಯ ಸಾಗಿದಂತೆ ಅಲ್ಲಿ ಕ್ರಮ ಕಡಿಮೆಯಾಗುತ್ತದೆ. ಆದರೆ ಜಗತ್ತಿನಲ್ಲಿ ನಾವು ಹಲವೆಡೆ ಈ ಕ್ರಮಬದ್ಧತೆ ಸ್ವಾಭಾವಿಕವಾಗಿ ಹುಟ್ಟುವುದನ್ನು ಕಾಣಬಹುದು. ಇದಕ್ಕೆ ಚಪ್ಪಾಳೆಯೇ ಒಂದು ಉದಾಹರಣೆ. ಮನುಷ್ಯರು ಹೇಗೆ ಒಂದೇ ತಾಳದಲ್ಲಿ ಚಪ್ಪಾಳೆ ಹೊಡೆಯುವರೋ, ಹಾಗೆಯೇ ಪ್ರಕೃತಿಯಲ್ಲಿ ಮಿಂಚು ಹುಳಗಳ ಹಿಂಡನ್ನು ನೋಡಿದರೆ ಅವುಗಳು ಒಟ್ಟಿಗೆ ಒಂದೇ ತಾಳದಲ್ಲಿ ಬೆಳಕು ಮಿಂಚಿಸುವುದನ್ನು ಕಾಣಬಹುದು. ನಮ್ಮ ಭೂಮಿಯ ಚಂದ್ರನನ್ನುನಿಸಿದರೆ ಒಂದೇ ಕ್ರಮದಲ್ಲಿ ಭೂಮಿಯನ್ನು ಸುತ್ತುತ್ತದೆ , ಹಾಗೆಯೇ ಚಂದ್ರನ ಕತ್ತಲೆ ಭಾಗವನ್ನು ನಮ್ಮ ಭೂಮಿಯಿಂದ ಎಂದು ನೋಡಲಾಗುವುದಿಲ್ಲ, ಇದು ಕೂಡ ಒಂದು ಕ್ರಮ. ಚಂದ್ರನು ಭೂಮಿಯ ಗುರುತ್ವಾಕರ್ಷಣೆಗೆ ಒಳಗಾದಾಗ ಕೆಲವು ಮಾರ್ಪಾಡುಗಳಿಂದ ತನ್ನ ವೇಗವನ್ನು ಭೂಮಿಯೊಂದಿಗೆ ಹೊಂದುಕೊಂಡಿತು. ಭೂಮಿ ಮಾತ್ರವಲ್ಲ ಗುರು ಗ್ರಹಗಳ ಚಂದ್ರಗಳಲ್ಲೂ ಈ ಕ್ರಮಬದ್ಧತೆ ಕಾಣಬಹುದಾಗಿದೆ. ಅಷ್ಟೇ ಅಲ್ಲದೆ ನಮ್ಮ ಹೃದಯಬಡಿತವು ಒಂದು ಕ್ರಮದಲ್ಲಿ ಬಡಿಯುತ್ತದೆ.
2000ನೇ ಇಸವಿಯ ಜೂನ್‌ನಲ್ಲಿ ಲಂಡನ್ ನಗರದ 1050 ಅಡಿ ಉದ್ದದ ಪ್ರಸಿದ್ದ ಮಿಲೇನಿಯಲ್ ಸೇತುವೆ ಉದ್ಘಾಟನೆಗೊಂಡಿತು. ಆದರೆ, ಎರಡೇ ದಿನಗಳಲ್ಲಿ ಈ ಸೇತುವೆಯನ್ನು ಮುಚ್ಚಲಾಯಿತು. ಕಾರಣ, ಸೇತುವೆ ಉದ್ಘಾಟನೆಗೆ ಲಕ್ಷಾಂತರ ಜನ ಸೇರಿದ್ದರು. ಸೇತುವೆ ಮೇಲೆ ಜನರೆಲ್ಲರೂ ನೂಕು ನುಗ್ಗಲಿನಲ್ಲಿ ಮುನ್ನುಗಿದರು. ಸ್ವಲ್ಪ ಸಮಯದಲ್ಲೇ ಪ್ರತಿಯೊಬ್ಬರೂ ತಮ್ಮ ಅಕ್ಕಪಕ್ಕದವರ ವೇಗಕ್ಕೆ ಹೊಂದುಕೊಂಡು, ಕೆಲವೇ ಸಮಯದಲ್ಲಿ ಸೇತುವೆಯ ಮೇಲೆ ಇದ್ದ ಎಲ್ಲಾ ಜನರು ಒಂದೇ ತಾಳದಲ್ಲಿ ಹೆಜ್ಜೆ ಹಾಕುತ್ತಿದ್ದರು. ಈ ಹೆಜ್ಜೆಗಳಿಂದ ಸೇತುವೆ ತೂಗಾಡಲು ಶುರುವಾಯಿತು. ಸೇತುವೆ ತೂಗುವಿಕೆಯನ್ನು ಹೊಂದಿಕೊಂಡು ಜನರು ನಡೆಯಲು ಶುರು ಮಾಡಿದರು. ಜನರು ತಮಗೆ ಅರಿವಿಲ್ಲದೆ ಒಂದೇ ತಾಳದಲ್ಲಿ ಹೆಜ್ಜೆ ಹಾಕುತ್ತಿದ್ದರು. ಇದು ಒಂದು ಫೀಡ್ ಬ್ಯಾಕ್ ತರ ಕೆಲಸವಾಗುತಿತ್ತು. ಪ್ರತಿಯೊಂದು ಕಟ್ಟಡ ಹಾಗೂ ವಸ್ತುಗಳಿಗೆ ಅದರದೇ ಆದ ರೆಸೊನಾನ್ಸ್ ಫ್ರೀಕ್ವೆನ್ಸಿ ಇರುತ್ತದೆ. ಹೇಗಾದರೂ ಮಾಡಿ ಆ ರೆಸೊನಾನ್ಸ್ ಫ್ರೀಕ್ವೆನ್ಸಿ ಅಲ್ಲಿ ಅಲ್ಲಾಡಿಸಿದರೆ ಅದು ಬಹಳ ದೊಡ್ಡ ಗಾತ್ರದಲ್ಲಿ ಅಲ್ಲಾಡಲು ಶುರುವಾಗುತ್ತದೆ. ಇಲ್ಲೂ ಸೇತುವೆ ಮೇಲೆ ನಡೆಯುತ್ತಿದೆ. ಜನರು ಸೇತುವೆಯ ರೆಸೊನಾನ್ಸ್ ಫ್ರೀಕ್ವೆನ್ಸಿಗೆ ಹೊಂದಿಕೊಂಡರು. ಇದರಿಂದಾಗಿ ಸೇತುವೆ
ತನ್ನ ಶಕ್ತಿ ಕಳೆದುಕೊಂಡಿತು. ಇದೇ ಕಾರಣಕ್ಕಾಗಿ ಸೈನಿಕರು ಸೇತುವೆ ದಾಟುವಾಗ ಗುಂಪಿನಲ್ಲಿ ಒಂದೇ ತಾಳದಲ್ಲಿ ಪಥಸಂಚಲನವನ್ನು ಬಿಟ್ಟು ಸಾಮಾನ್ಯವಾಗಿ ಹೆಜ್ಜೆಹಾಕುತ್ತಾರೆ.
ಗುಂಪಿನಲ್ಲಿ ಹಾರುವ ಹಕ್ಕಿಗಳು ಅಥವಾ ಗುಂಪಿನಲ್ಲಿ ಈಜಾಡುವ ಮೀನುಗಳನ್ನು ಕಂಡರೆ ಅವು ಎಂದಿಗೂ ಒಂದಕ್ಕೊಂದು ಡಿಕ್ಕಿ ಹೊಡೆಯುವುದಿಲ್ಲ, ಆದರೂ ಒಂದೇ ಮಾರ್ಗದಲ್ಲಿ ಕ್ರಮಬದ್ಧವಾಗಿ ಸಾಗುತ್ತವೆ. ಇದನ್ನು ವಿವರಿಸಲು ವಿಜ್ಞಾನಿಗಳು BOIDS algorithm ಉಪಯೋಗಿಸುತ್ತಾರೆ. ಆದರೆ, ಮೂಕ ಜೀವಿಗಳಿಗೆ ಹೀಗೆಯೇ ವರ್ತಿಸಬೇಕು ಎಂಬ ವಿಷಯ ಹೇಗೆ ತಿಳಿಯುತ್ತದೆ? ಇದರಂತೆಯೇ ನೀರು ಮಂಜುಗಡ್ಡೆ ಆಗುವುದನ್ನುವಿವರಿಸಬಹುದು. ಅದರ ಅಣುಗಳು ಪರಮಾಣುಗಳನ್ನು ಸೂಕ್ಷ್ಮವಾಗಿ ವೀಕ್ಷಿಸಿದರೆ ಅವುಗಳ ಚಪ್ಪಾಳೆಗಳು ಕಾಣಿಸುವುದು.ಅದೇನೇ, ಇರಲಿ. ನೀವೂ ಚಪ್ಪಾಳೆ ಹೊಡೆಯಿರಿ. ಇನ್ನೊಬ್ಬರು ಸಾಧನೆಗೈದಾಗ, ಹೃತ್ತೂರ್ವಕವಾಗಿ ಚಪ್ಪಾಳೆ ಹೊಡೆಯುವುದು ನಿಮ್ಮ ಹೃದಯದ ಆರೋಗ್ಯಕ್ಕೂ ಒಳ್ಳೆಯದು. ಚಪ್ಪಾಳೆ ನಿಮ್ಮ ಆಯುಸ್ಸನ್ನೂ ಹೆಚ್ಚಿಸುತ್ತೆ ಸ್ವಾಮಿ….