ವಿದ್ಯುತ್ ವಾಹನ ಕ್ಷೇತ್ರಕ್ಕಿದು ಮರುಪೂರಣದ ಸಮಯ
ನಮ್ಮೂರಿನ ಪ್ರಖ್ಯಾತ ದೇವಸ್ಥಾನದ ಮುಖ್ಯ ರಸ್ತೆಯಲ್ಲಿ ನಮ್ಮ ಮನೆ. ಸದಾ ಗಿಜಗುಡುವ ಜಾಗವಾಗಿದ್ದ ಕಾರಣಕ್ಕೆ ಪರೀಕ್ಷೆಯ ಸಮಯದಲ್ಲಿ ಸಾಯಂಕಾಲ ಮನೆಯ ಬಾಗಿಲುಗಳನ್ನೆಲ್ಲ ಮುಚ್ಚಿ ಅಮ್ಮ ನನ್ನನ್ನು ಗದರಿಸಿ ಓದಲು ಕೂರಿಸುತ್ತಿದ್ದರು. ಪ್ರತಿದಿನ ರಾತ್ರಿ ತಳ್ಳುಗಾಡಿಯವನೊಬ್ಬ ದೊಡ್ಡ ಗಾಜಿನ ಭರಣಿಯಲ್ಲಿ ಬೊಂಬಾಯಿ ಮಿಠಾಯಿಯನ್ನಿಟ್ಟುಕೊಂಡು ನಮ್ಮ ಮನೆಯೆದುರಿನ ರಸ್ತೆಯಿಂದ ಹೋಗುತ್ತಿದ್ದ. ಆತನ ಗಾಡಿಯ ಮುಂದೆ ಕಟ್ಟಿದ್ದ ಗಂಟೆಯ ಸದ್ದಿನಿಂದ ನಮಗೆಲ್ಲರಿಗೂ ಆತನ ಬರುವಿಕೆ ತಿಳಿಯುತ್ತಿತ್ತು. ನನ್ನಂತೆಯೇ ಮನೆಯ ಹಜಾರದ ಮೇಲೆ ಓದುತ್ತ ಕುಳಿತಿರುತ್ತಿದ್ದ ನನ್ನ ಸ್ನೇಹಿತರೆಲ್ಲ ಆ ಸದ್ದಿಗೆ ನಾಲ್ಕಾಣೆ ಹಿಡಿದುಕೊಂಡು ತಕ್ಷಣವೇ ಎದ್ದೋಡಿ ರಸ್ತೆಗೆ ಇಳಿಯುತ್ತಿದ್ದರು. ಈಗಲೂ ನನಗೆ ಗಂಟೆಯ ಸದ್ದು ಕೇಳಿದಾಗಲೆಲ್ಲ ಆ ಬೊಂಬಾಯಿ ಮಿಠಾಯಿಯ ನೆನಪಾಗುತ್ತದೆ. ಮುಂದೆ ಹೈಸ್ಕೂಲಿಗೆ ಸೇರಿಕೊಂಡಾಗ ನಮ್ಮ ಶಾಲೆ ಮನೆಯಿಂದ ದೂರವಿದ್ದ ಕಾರಣಕ್ಕೆ ಅಪ್ಪ ನನಗೆ ಸೈಕಲೊಂದನ್ನು ಕೊಡಿಸಿದ್ದರು. ಅಂಗಡಿಯವನ ಶಿಫಾರಸ್ಸಿನ ಮೇರೆಗೆ ನನ್ನ ಸೈಕಲ್ಲಿನ ಚಕ್ರದ ಕಡ್ಡಿಗಳಿಗೆ ಮಣಿಗಳನ್ನು ಜೋಡಿಸಿದ್ದ ಕಾರಣ ಚಕ್ರ ತಿರುಗುವ ಸಮಯದಲ್ಲಿ ಈ ಮಣಿಗಳು ಅತ್ತಿತ್ತ ಓಡಾಡುತ್ತ ಗೆಜ್ಜೆಯಂತೆ ಸದ್ದು ಮಾಡಿ ರಸ್ತೆಯಲ್ಲಿ ಹೋಗುತ್ತಿರುವವರಿಗೆ ದಾರಿಬಿಡಲು ತಿಳಿಸುತ್ತಿದ್ದವು. ನನ್ನ ಕೆಲವು ಸ್ನೇಹಿತರಂತೂ ಕ್ಯಾರಿಯರ್ ಮತ್ತು ಚಕ್ರದ ನಡುವೆ ಬಲೂನ್ ಅನ್ನು ಕಟ್ಟಿ ಸೈಕಲ್ ಚಕ್ರದ ಕಡ್ಡಿಗಳು ಅದನ್ನುಜ್ಜುವಂತೆ ಮಾಡಿ ಅದರಿಂದ ಜೋರಾದ ಸದ್ದು ಹೊರಡಿಸುತ್ತಿದ್ದರು. ನಮಗಾಗ ಅದುವೇ ಬುಲ್ಲೆಟ್ಟು.
ನಿಮ್ಮ ಜೀವನದಲ್ಲೂ ಈ ರೀತಿಯ ಮರೆಯಲಾಗದ ಮಧುರ ಸದ್ದುಗಳ ನೆನಪುಗಳಿರಬೇಕಲ್ಲವೇ. ಸ್ನೇಹಿತನಿಗೆ ದುಂಬಾಲು ಬಿದ್ದು ಆತನಿಂದ ಒಂದೊಂದೇ ರೈಡು ಕೇಳುತ್ತ ಮೊದಲಬಾರಿ ಓಡಿಸಲು ಕಲಿತ ಮೊಪೆಡ್ ಮಾಡುತ್ತಿದ್ದ ಸದ್ದು, ಖುದ್ದು ಸಂಪಾದಿಸತೊಡಗಿದ ನಂತರ ಅಲ್ಪಸ್ವಲ್ಪ ಕಾಸನ್ನು ಸೇರಿಸಿಟ್ಟುಕೊಂಡು ಖರೀದಿಸಿದ ಮೊದಲ ಬೈಕಿನ ಸದ್ದು… ಇವುಗಳೆಲ್ಲ ನಮ್ಮ ಜೀವನದ ಅವಿಸ್ಮರಣೀಯ ಸದ್ದುಗಳು. ಈಗಲೂ ಅಷ್ಟೇ. ನಾವು ಹೊಸ ಬೈಕು ಅಥವಾ ಕಾರನ್ನು ಖರೀದಿಸುವಾಗ ಅದು ಹೊರಡಿಸುವ ಸದ್ದು ನಮಗಿಷ್ಟವಾಗಿರುವುದೂ ಆ ಆಯ್ಕೆಯ ಹಿಂದಿನ ಒಂದು ಪ್ರಮುಖ ಕಾರಣವಾಗಿರುತ್ತದೆ.
ಕೆಲ ದಿನಗಳ ಹಿಂದೆ ಕಾರು ಉದ್ಯಮದ ಹೆಸರಾಂತ ಕಂಪನಿಯೊಂದರ ನೂತನ ಸರಣಿಯ ಕಾರುಗಳ ವಿಶೇಷತೆಗಳ ಕುರಿತಾದ ಮಾಹಿತಿಗಳು ಮಾಧ್ಯಮಗಳಲ್ಲಿ ವರದಿಯಾದವು. ಅತ್ಯಾಧುನಿಕ ತಂತ್ರಜ್ಞಾನ ಅಳವಡಿಸಿಕೊಂಡು ಹಲವು ಪ್ರಥಮಗಳನ್ನು ಹೊಂದಿರುವ ಈ ಕಾರುಗಳಲ್ಲಿ ಫೇಸ್ ರಿಕಗ್ನಿಷನ್, ಟಚ್ ಸೆನ್ಸಾರ್ ಗಳ ಜೊತೆಗೆ ಅವುಗಳು ಹೊರಡಿಸುವ ಸದ್ದಿಗೆ ಮೆನುವೊಂದನ್ನು ಕೊಡಲಾಗಿದೆ. ಈ ಕಾರುಗಳ ಮಾಲೀಕರು ತಾವು ಕಾರನ್ನು ಖರೀದಿಸುವ ಸಮಯದಲ್ಲಿ ಆ ಆಯ್ಕೆಗಳಲ್ಲಿ ತಮಗಿಷ್ಟವಾದದ್ದನ್ನು ಆಯ್ದುಕೊಳ್ಳಬಹುದು. ಅದರ ಪ್ರಕಾರವೇ ಟ್ಯೂನ್ ಆದ ಕಾರುಗಳು ಮಾಲೀಕರ ಸೇವೆಗೆ ಸಿದ್ಧ. ಏನೋ ವಿಚಿತ್ರವಾಗಿದೆಯಲ್ವೇ? ಸೌಂಡು ಕೇಳಿ ಕಾರಿನ ಆರೋಗ್ಯವನ್ನು ಗ್ರಹಿಸುವ ನಮ್ಮ ಮೆಕ್ಯಾನಿಕ್‌ಗಳಿಗೆ ಇದರಿಂದ ಗೊಂದಲವಾಗದಿರದೆ? ಎಂಬ ಅನುಮಾನ ಸರಿಯೇ, ಆದರೆ ಈ ಮೆನುವಿನಹಿಂದಿರುವ ಕಾರಣವೆಂದರೆ ಈ ಕಾರುಗಳು ಇವಿ ಅಂದರೆ ಬ್ಯಾಟರಿ ಚಾಲಿತ ವಿದ್ಯುತ್ ಕಾರುಗಳು.
ವಾಹನೋದ್ಯಮದಲ್ಲಿ ವಿದ್ಯುತ್ ಚಾಲಿತ ವಾಹನಗಳು ರಸ್ತೆಗಿಳಿದ ನಂತರ ಉದ್ಭವವಾದ ಹೊಸ ತೊಂದರೆಯಿದು. ಹೆಚ್ಚಿನ ಸಿಸಿ ಸಾಮರ್ಥ್ಯದ ಪೆಟ್ರೋಲ್, ಡೀಸೆಲ್ ವಾಹನಗಳು ರಸ್ತೆಗಿಳಿದು ಹೊರಡಿಸುತ್ತಿದ್ದ ಭಾರಿ ಶಬ್ದಕ್ಕೆ ಕಿವಿಮುಚ್ಚಿಕೊಂಡು ಅದೆಷ್ಟು ಬಾರಿ ಆ ಶಬ್ದಮಾಲಿನ್ಯದಿಂದ ಮುಕ್ತಿಕೊಡಲು ಬೇಡಿಕೊಂಡಿದ್ದೇವೆಯೋ ಏನೋ. ಅದರಲ್ಲೂ ಬೇರೆಯವರ ಗಮನ ತಮ್ಮೆಡೆ ಸೆಳೆಯಲು ಯುವಕರು, ಪಡ್ಡೆಹುಡುಗರು ಬೈಕ್‌ನ ಸೈಲೆನ್ಸ‌ನ್ನು ಮಾರ್ಪಡಿಸಿಯೋ ಅಥವಾ ಬದಲಿಸಿಯೋ ರಸ್ತೆಯಲ್ಲಿ ಜೋರಾಗಿ ಓಡಾಡುತ್ತ ಮಾಡುವ ಶಬ್ದಮಾಲಿನ್ಯದ ಕಿರಿಕಿರಿ ಮತ್ತು ಅವಾಂತರ ಅಷ್ಟಿಷ್ಟಲ್ಲ. ಇಂತಹುದರಲ್ಲಿ ರಸ್ತೆಯಲ್ಲಿ ಶಾಂತಿಯನ್ನು ಬಯಸುತ್ತಿದ್ದ ನಮಗೆ ಒಂದು ದಿನ ಶಬ್ದವಿಲ್ಲದ ಮೂಕವಾಹನಗಳಿಂದಲೂ ತೊಂದರೆಯುಂಟಾಗಬಹುದೆಂಬ ಕಲ್ಪನೆಯೂ ಇರಲಿಲ್ಲ.
ರಸ್ತೆಯ ಮೇಲಿನ ಶಬ್ದದ ಪ್ರಮಾಣಕ್ಕೂ ಮಿತಿಗಳಿವೆ. ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ ಹಗಲಿನಲ್ಲಿ ರಸ್ತೆಗಳ ಮೇಲೆ ಶಬ್ದದ ಪ್ರಮಾಣ 53 ಡೆಸಿಬಲ್ ಗಿಂತ ಹೆಚ್ಚಿರಬಾರದು. ಆದರೆ ಇದು ಎಲ್ಲ ಕಡೆ ಸಲ್ಲುವ ಮಿತಿಯಲ್ಲ. ಬದಲಾಗಿ ಪ್ರತಿಯೊಂದು ದೇಶಗಳೂ ತಮ್ಮದೇ ಆದ ಶಬ್ದದ ಮಿತಿಯನ್ನು ಅಳವಡಿಸಿಕೊಂಡಿವೆ. ಭಾರತದಲ್ಲಿ ಕೇಂದ್ರೀಯ ಮಾಲಿನ್ಯ ನಿಯಂತ್ರಣ ಮಂಡಳಿ ಪ್ರಾದೇಶಿಕವಾಗಿ 50 ರಿಂದ 75 ವರೆಗಿನ ಶಬ್ದದ ಪ್ರಮಾಣದ ಮಿತಿಯನ್ನು ರಸ್ತೆಗಳ ಮೇಲೆ ಗೊತ್ತುಮಾಡಿದೆ. ಆದರೆ ನೈಜಸ್ಥಿತಿ ಅದಕ್ಕಿಂತ ಎಷ್ಟೋ ಭಿನ್ನವಾಗಿದ್ದು, ಭಾರತೀಯ ರಸ್ತೆಗಳ ಮೇಲೆ 70 ರಿಂದ 95 ಡೆಸಿಬಲ್‌ವರೆಗಿನ ಸದ್ದನ್ನು ಗಮನಿಸಲಾಗಿದೆ. ಇಂತಹ ಶಬ್ದಮಾಲಿನ್ಯವಿರುವ ರಸ್ತೆಗಳ ನಡುವೆ ಒಂಚೂರೂ ಸದ್ದನ್ನೇ ಹೊರಡಿಸದ ವಿದ್ಯುತ್ ವಾಹನಗಳು ಬಂದರೆ ಪಾದಚಾರಿ ಮತ್ತು ಬೇರೆ ವಾಹನಗಳು ಅದರ ಆಗಮನವನ್ನು ಗುರುತಿಸುವುದು ಹೇಗೆ ಮತ್ತು ಸ್ಪಂದಿಸುವುದು ಹೇಗೆ? ಸಾಮಾನ್ಯರ ಪರಿಸ್ಥಿತಿಯೇ ಹೀಗಾದಲ್ಲಿ ದೃಷ್ಟಿಹೀನರ ಮತ್ತುವಿಶೇಷಚೇತನರ ಪರಿಸ್ಥಿತಿ ಏನಾಗಬೇಡ?
ಇದನ್ನೂ ಓದಿ:ಚುನಾವಣೆಯಲ್ಲಿ ಹಸ್ತಕ್ಷೇಪ ಸಲ್ಲ
ಪಾದಚಾರಿಗಳ ಸುರಕ್ಷತೆಯನ್ನು ಗಮನದಲ್ಲಿ ಇಟ್ಟುಕೊಂಡು ಅಮೆರಿಕ, ಯೂರೋಪಿಯನ್ ಯೂನಿಯನ್, ಜಪಾನ್ ಸೇರಿದಂತೆ ಹಲವು ದೇಶಗಳು ವಿದ್ಯುತ್ ವಾಹನಗಳು ಕನಿಷ್ಠ ಇಂತಿಷ್ಟಾದರೂ ಶಬ್ದವನ್ನು ಹೊರಹೊಮ್ಮಿಸಬೇಕೆಂಬ ಕಾನೂನನ್ನು ಜಾರಿಗೆ ತಂದಿವೆ. ಈ ಬದಲಾವಣೆಗೆ ಅಣಿಯಾಗುತ್ತಿರುವ ತಯಾರಿಕಾ ಕಂಪನಿಗಳು ಪೆಟ್ರೋಲ್ ವಾಹನಗಳ ಸದ್ದನ್ನು ಹೊರಡಿಸುವ ಕೃತಕ ಧ್ವನಿ ಉತ್ಪಾದಕಗಳನ್ನು ವಿದ್ಯುತ್ ವಾಹನಗಳಲ್ಲಿ ಅಳವಡಿಸುತ್ತಿವೆ. ‘ಆವಾಸ್’ ಅಂದರೆ ‘ಆಟೋಮ್ಯಾಟಿಕ್ ವೆಹಿಕಲ್ ಎಕೌಸ್ಟಿಕ್ ಸಿಸ್ಟಂ’ ಎಂಬ ಈ ಉಪಕರಣವು ಥೇಟು ಪೆಟ್ರೋಲ್ ಮತ್ತು ಡೀಸೆಲ್ ವಾಹನಗಳ ಸದ್ದನ್ನೇ ಅನುಕರಿಸಿ ರಸ್ತೆಯಲ್ಲಿನ ಪಾದಚಾರಿಗಳಿಗೆ ವಾಹನದ ಬರುವಿಕೆಯನ್ನು ತಿಳಿಹೇಳಲಿದೆ. ಈ ಉಪಕರಣಗಳಲ್ಲಿ ನಮ್ಮ ಮೊಬೈಲುಗಳ ರಿಂಗ್‌ಟೋನ್‌ಗಳಂತೆ ಡಿಜಿಟಲ್ ರೂಪದಲ್ಲಿ ಸಂಗ್ರಹವಾಗಿರುವ ಧ್ವನಿಯ ಫೈಲ್‌ಗಳು ಧ್ವನಿಪೆಟ್ಟಿಗೆಗಳ ಮೂಲಕ ನಮಗೆ ಬೇಕಾದ ವಿಧದ ಧ್ವನಿಗಳನ್ನುಹೊರಹೊಮ್ಮಿ ಸುವುದರಿಂದ ಆ ಆಯ್ಕೆ ಮಾಲೀಕನ ಬಳಿ ಇರಲಿದೆ.
ಭಾರತವೂ ಇದೀಗ ವಿದ್ಯುತ್ ವಾಹನಗಳಿಗೆ ಕನಿಷ್ಠ ಪ್ರಮಾಣದ ಧ್ವನಿಯನ್ನು ಹೊರಹೊಮ್ಮಿಸುವ ಕಾನೂನನ್ನು ಜಾರಿಗೆ ತರುವ ತಯಾರಿಯಲ್ಲಿದೆ. ಮೂಲಗಳ ಪ್ರಕಾರ ಈಗಾಗಲೇ ಭಾರತೀಯ ವಾಹನ ಸಂಶೋಧನಾ ಸಂಘ (ARAI) ಈ ನಿಟ್ಟಿನಲ್ಲಿ ಕಾರ್ಯೋನ್ಮುಖವಾಗಿದ್ದು, ‘ಸ್ವದೇಶಿ ಆಟೋಮ್ಯಾಟಿಕ್ ವೆಹಿಕಲ್ ಎಕೌಸ್ಟಿಕ್ ಸಿಸ್ಟಂ’ ಅನ್ನು ಅಭಿವೃದ್ಧಿಪಡಿಸುವತ್ತ ಅದು ಕಾರ್ಯೋನ್ಮುಖವಾಗಿದೆ ಎಂದು ಹೇಳಲಾಗುತ್ತಿದೆ. ಮೊದಲಿಗೆ ವಿದ್ಯುತ್ ಕಾರುಗಳಲ್ಲಿ ಕೃತಕ ಶಬ್ದಗಳನ್ನು ಅಳವಡಿಸಿ ತದನಂತರ ದ್ವಿಚಕ್ರ ವಾಹನಗಳಿಗೂ ಇದನ್ನು ವಿಸ್ತರಿಸುವ ಯೋಚನೆ ಸರ್ಕಾರದ್ದು.
ಫೆಬ್ರವರಿ 1ರಂದು ಮಂಡನೆಯಾದ 2025-26ನೇ ಸಾಲಿನ ಕೇಂದ್ರ ಬಜೆಟ್ ವಿದ್ಯುತ್ ಚಾಲಿತ ವಾಹನಗಳ ಕ್ಷೇತ್ರಕ್ಕೆ ಭರ್ಜರಿ ಉಡುಗೊರೆಯನ್ನು ನೀಡಿದೆ. ‘ಪ್ರಧಾನ ಮಂತ್ರಿ ಇ-ಡ್ರೈವ್’ ಯೋಜನೆಯಡಿ ಈ ಕ್ಷೇತ್ರದ ಮೂಲಭೂತ ಸೌಕರ್ಯಗಳಿಗಾಗಿ ಅನುದಾನವನ್ನು ಶೇಕಡ 20ರಷ್ಟು ಹೆಚ್ಚಿಸಲಾಗಿದೆ. ವಿದ್ಯುತ್ ವಾಹನಗಳಿಗೆ ಅಗತ್ಯವಾಗಿರುವ ಬ್ಯಾಟರಿ ತಯಾರಿಕೆಯ ಮೂವತ್ತೆಂಟು ಮೂಲವಸ್ತುಗಳ ಮೇಲಿನ ಮೂಲ ಅಬಕಾರಿ ಸುಂಕವನ್ನು ಮಾ ಮಾಡಲಾಗಿದೆ. ಈ ಎಲ್ಲ ಕ್ರಮಗಳು ಭಾರತದೆಲ್ಲೆ ವಿದ್ಯುತ್ ವಾಹನಗಳ ಚಾರ್ಜಿಂಗ್ ಸ್ಟೇಷನ್‌ಗಳಂತಹ ಮೂಲಸೌಕರ್ಯಗಳ ವೃದ್ಧಿಯ ಜೊತೆಗೆ ಇ-ವಾಹನಗಳ ಬೆಲೆಗಳನ್ನೂ ತಗ್ಗಿಸಲಿದೆ. ಒಟ್ಟಾರೆಯಾಗಿ ಮುಂಬರುವ ದಿನಗಳಲ್ಲಿ ನಮ್ಮ ರಸ್ತೆಗಳ ಮೇಲೆ ಓಡಾಡುವ ವಿದ್ಯುತ್ ವಾಹನಗಳ ಸಂಖ್ಯೆಯನ್ನು ಗಣನೀಯವಾಗಿ ಹೆಚ್ಚಿಸಲಿದೆ.
ಸದ್ಯಕ್ಕೆ ವಿದ್ಯುತ್ ಚಾಲಿತ ವಾಹನಗಳಲ್ಲಿ ಹೆಚ್ಚಾಗಿ ಬಳಕೆಯಾಗುವುದು ಲಿಥಿಯಂ ಆಯಾನ್ ಬ್ಯಾಟರಿಗಳು ವಿದ್ಯುತ್ ವಾಹನಗಳು ಭವಿಷ್ಯದ ರಸ್ತೆಯ ಮಾಲೀಕರು ಎಂಬುದು ಗೊತ್ತಾಗಿದ್ದೇ ತಡ ಎಲ್ಲರ ಕಣ್ಣು ಲಿಥಿಯಂ ನಿಕ್ಷೇಪಗಳ ಮೇಲೆ ಬಿತ್ತು. ಒಂದೆರಡು ವರ್ಷಗಳ ಹಿಂದೆ ಭಾರತದಲ್ಲೂ ಲಿಥಿಯಂ ನಿಕ್ಷೇಪ ಸಿಕ್ಕಿದ್ದು
ಜಾಗತಿಕವಾಗಿ ದೊಡ್ಡ ಸುದ್ದಿಯಾಗಿತ್ತು. ಲಿಥಿಯಂ ಗಣಿಗಾರಿಕೆ ಮತ್ತು ಲಭ್ಯತೆಯಲ್ಲಿ ಕೆಲವು ತೊಂದರೆಗಳಿರುವ ಕಾರಣ ಮತ್ತೊಂದೆಡೆ ಬದಲಿ ತಂತ್ರಜ್ಞಾನದ ಅನ್ವೇಷಣೆ ವಿಜ್ಞಾನಿಗಳಿಂದ ನಡೆಯುತ್ತಲೇ ಇತ್ತು. ಇದೀಗ ಆ ನಿಟ್ಟಿನಲ್ಲಿ ಹಲವು ಆವಿಷ್ಕಾರಗಳಾಗಿದ್ದು, ಅವುಗಳಲ್ಲಿ ಒಂದಾಗಿರುವ ಸಾಲಿಡ್ ಸ್ಟೇಟ್ ಬ್ಯಾಟರಿಗಳನ್ನು ಅಳವಡಿಸಿಕೊಂಡ ಹೊಸ ವಿದ್ಯುತ್ ಕಾರುಗಳು ಈ ವರ್ಷ ರಸ್ತೆಗಿಳಿಯುವ ನ್ನು ನಿರೀಕ್ಷೆಯಿದೆ. ಈ ನೂತನ ತಂತ್ರಜ್ಞಾನದಲ್ಲಿ ಇದುವರೆಗೆ ಲಿಥಿಯಂ ಆಯಾನ್ ಬ್ಯಾಟರಿಗಳಲ್ಲಿ ದ್ರವ ಮತ್ತು ಜೇಲ್ ರೂಪದಲ್ಲಿ ಬಳಸಲ್ಪಡುತ್ತಿದ್ದ ಎಲೆಕ್ಟೋಲೈಟ್ ತ್ತು ಬದಲು ಘನರೂಪದ ಎಲೆಕ್ಟೋಲೈಟ್ ಗಳನ್ನು ಬಳಸಲಾಗುತ್ತಿದ್ದು, ಇದರಿಂದ ಒಂದು ಗಾತ್ರದ ಬ್ಯಾಟರಿಯೊಂದರ ವಿದ್ಯುತ್ತನ್ನು ಕೂಡಿಟ್ಟುಕೊಳ್ಳುವ ಕ್ಷಮತೆ ಇಮ್ಮಡಿಯಾಗಲಿದೆ. ಪರಿಣಾಮ ಕಾರಿನ ಮೈಲೇಜ್ ಗಣನೀಯವಾಗಿ ಹೆಚ್ಚಲಿದ್ದು, ಮೂಲಗಳ ಪ್ರಕಾರ ಒಮ್ಮೆ ಚಾರ್ಜ್ ಮಾಡಿದ ಸಾಲಿಡ್ ಸ್ಟೇಟ್ ಬ್ಯಾಟರಿಗಳ ಪ್ರಾಯೋಗಿಕ ಪರೀಕ್ಷೆಯಲ್ಲಿ 900ರಿಂದ 1000 ಕಿ.ಮೀ.ಯಷ್ಟು ದೂರ ಕ್ರಮಿಸುತ್ತಿವೆ ಹಾಗೂ ಅವುಗಳು ಚಾರ್ಜ್ ಹತ್ತರಿಂದ ಹದಿನೈದು ನಿಮಿಷದಲ್ಲಾಗುತ್ತಿವೆ. ಅತಿಮುಖ್ಯವಾಗಿ ಘನರೂಪದ ಎಲೆಕ್ಟೋಲೈಟ್ ಇರುವ ಕಾರಣ ಈ ಬ್ಯಾಟರಿಗಳ ಸ್ಫೋಟಿಸುವ ಅಥವಾ ಬೆಂಕಿ ಹೊತ್ತಿಕೊಳ್ಳುವ ಸಾಧ್ಯತೆ ಕಡಿಮೆ.
ಕಳೆದ ವಾರ ವಾಹನ ಕ್ಷೇತ್ರದ ದಿಗ್ಗಜ ಟೆಸ್ಲಾ ಕಂಪನಿಯ ಮಾಲೀಕ ಎಲಾಹ ಮಸ್ಕ್ ತನ್ನ ಕಂಪನಿಯ ಹೊಸ ಮಾಡೆಲ್ಲುಗಳ ಕಾರುಗಳಲ್ಲಿ ಲಿಥಿಯಾ ಆಯಾನ್ ಬ್ಯಾಟರಿಗಳ ಬದಲು ಅಲ್ಯೂಮಿನಿಯಂ ಆಯಾನ್ ಬ್ಯಾಟರಿಗಳವ ಬಳಸುತ್ತಿರುವುದಾಗಿ ಘೋಷಿಸಿದರು. ಮಸ್ಕ್ ಪ್ರಕಾರ ಈ ಬ್ಯಾಟರಿಗಳನ್ನು ಚಾಜ ಮಾಡಲು ಹದಿನೈದು ನಿಮಿಷ ಕಾಲಾವಧಿ ಬೇಕಿದ್ದು, ಒಂದು ಚಾರ್ಜ್‌ಗೆ 7 ಮೈಲಿ ಅಂದರೆ ಸುಮಾರು 1200 ಕಿ.ಮೀ ದೂರ ಕ್ರಮಿಸುವ ಕ್ಷಮತೆ ಹೊಂದಿ ಈ ಬ್ಯಾಟರಿಗಳನ್ನು ಅಳವಡಿಸಿರುವ ವಿದ್ಯುತ್ ವಾಹನಗಳು ರಸ್ತೆಗಿಳಿದ ಮೇಲೆ೦ ಅವುಗಳ ಕ್ಷಮತೆ ಬಗ್ಗೆ ಖಚಿತವಾಗಿ ಹೇಳಬಹುದಾದರೂ ಅಲ್ಯೂಮಿನಿ-ತೂಕದಲ್ಲಿ ಹಗುರವಾಗಿರುವುದರ ಜೊತೆಗೆ ಜಾಗತಿಕವಾಗಿ ಮೂರನೇ ಅತಿಹ ಉಪಲಬ್ಧವಿರುವ ಲೋಹವಾಗಿರುವ ಕಾರಣ ಅಲ್ಯೂಮಿನಿಯಂ ಆಯಾನ್ ಬ್ಯಾಟರಿಗಳ ತೂಕ ಮತ್ತು ವೆಚ್ಚವೆರಡೂ ಕಡಿಮೆಯಾಗಲಿದೆ.ಗೋಲ್ಡ್‌ಮನ್ ಸ್ಯಾಕ್ಸ್ ವರದಿಯ ಪ್ರಕಾರ, 2023ಕ್ಕೆ ಹೋಲಿಸಿದರೆ ವಿದ್ಯುತ್ ವಾಹನಗಳಲ್ಲಿ ಬಳಸಲಾಗುವ ಬ್ಯಾಟರಿಗಳ ದರ 2026ರಲ್ಲಿ ಅರ್ಧದಷ್ಟು ಕಡಿಮೆಯಾಗಲಿದೆ. ನೂತನ ತಂತ್ರಜ್ಞಾನಗಳ ಅವಿಷ್ಕಾರ ಮತ್ತು ತಯಾರಿಕಾ ವಿಧಾನದಲ್ಲಿ ಹೆಚ್ಚಿನ ಕ್ಷಮತೆ ಇದಕ್ಕೆ ಪ್ರಮುಖ ಕಾರಣವೆನ್ನುತಿದೆ ಆ ವರದಿ. ಅಂದಹಾಗೆ ಫೆಬ್ರವರಿ 18 ವಿಶ್ವ ಬ್ಯಾಟರಿ ದಿನ. ಬಜೆಟ್ ಉಪಕ್ರಮಗಳು ಮತ್ತು ನೂತನ ತಂತ್ರಜ್ಞಾನದ ಆವಿಷ್ಕಾರದ ಕಾರಣ ಮುಂದಿನ ದಿನಗಳಲ್ಲಿ ಬ್ಯಾಟರಿ ಚಾಲಿತ ವಾಹನಗಳು ಶ್ರೀಸಾಮಾನ್ಯನ ಜೇಬಿಗೆ ಮತ್ತಷ್ಟು ಹಗುರವಾಗುವ ಎಲ್ಲ ಲಕ್ಷಣಗಳೂ ಕಂಡುಬರುತ್ತಿವೆ. ನೀವೂ ಒಂದು ಇ-ವಾಹನ ಖರೀದಿಸುವ ಯೋಜನೆ ಹಾಕಿಕೊಂಡಿದ್ದಲ್ಲಿ ಇದು ಸುಸಮಯ.