ಡ್ರಗ್ಸ್: ಮೂಲವೇ ನಾಪತ್ತೆ
ಇವಷ್ಟೇ ಅಲ್ಲ, ರಾಜ್ಯದಲ್ಲಿ ದಾಖಲಾಗುತ್ತಿರುವ ಬಹುತೇಕ ಡ್ರಗ್ಸ್ ಪ್ರಕರಣಗಳಲ್ಲಿ ಮೂಲ ಪತ್ತೆಯೇ ಪೊಲೀಸರಿಗೆ ಸವಾಲು ಆಗಿದೆ. ಡ್ರಗ್ಸ್ ಎಂಬ ಹೆಮ್ಮರದ ಎಲೆ-ಕೊಂಬೆಗಳನ್ನು ಮಾತ್ರ ಪೊಲೀಸರು ಕತ್ತರಿಸಿದ್ದಾರೆ ಹೊರತು ಅದರ ಬುಡದವರೆಗೆ ತಲುಪಲು ಆಗಿಲ್ಲ. ಇದರಿಂದ, ‘ಡ್ರಗ್ಸ್’ ಮರದ ಬೇರು ಇನ್ನಷ್ಟು ಆಳ ಹೋಗುತ್ತಿದೆ. ಗಟ್ಟಿಯಾಗುತ್ತಿದೆ.
ನೈಸರ್ಗಿಕ ಹಾಗೂ ಸಿಂಥೆಟಿಕ್ ಡ್ರಗ್ಸ್ ತರಿಸಿ, ಮಾರುವ ಆರೋಪಿಗಳು ಮಾತ್ರ ಪೊಲೀಸರಿಗೆ ಸಿಕ್ಕಿಬೀಳುತ್ತಾರೆ. ಆದರೆ, ಡ್ರಗ್ಸ್ ಕೊಟ್ಟವರು ಮತ್ತು ತಯಾರಿಸಿದವರು ಯಾರು ಎಂಬುದನ್ನು ಪತ್ತೆ ಮಾಡಲು ಪೊಲೀಸರಿಗೆ ಸಾಧ್ಯವಾಗುತ್ತಿಲ್ಲ. ಇದಕ್ಕೆ ಕೆಲಸದ ಒತ್ತಡ, ಮಾನವ ಸಂಪನ್ಮೂಲ ಮತ್ತು ಆರ್ಥಿಕ ಕೊರತೆಯೂ ಕಾರಣ.
ಮುಂಬೈ, ಬೆಂಗಳೂರಿನಂತಹ ಮಹಾನಗರಿ ಗಳಿಗೆ ಸೀಮಿತವಾಗಿದ್ದ ಡ್ರಗ್ಸ್ ದಂಧೆ ಹಾವೇರಿ, ಹುಬ್ಬಳ್ಳಿ, ಬೆಳಗಾವಿ, ಮಂಗಳೂರು, ದಾವಣಗೆರೆ ಮುಂತಾದ ನಗರಗಳಿಗೂ ವ್ಯಾಪಿಸಿದೆ. ಡ್ರಗ್ಸ್ ವ್ಯಸನಿಗಳ ಸಂಖ್ಯೆಯೂ ಹೆಚ್ಚಿದೆ. ಎಷ್ಟೇ ಪ್ರಮಾಣದಲ್ಲಿ ಡ್ರಗ್ಸ್ ಜಪ್ತಿ ಮಾಡಿದರೂ, ಆರೋಪಿಗಳನ್ನು ಬಂಧಿಸಿದರೂ ದಂಧೆಯ ಮೂಲ ಪತ್ತೆ ಆಗುತ್ತಿಲ್ಲ. ಇದಕ್ಕೆ ಪೊಲೀಸರಲ್ಲೂ ಸ್ಪಷ್ಟ ಉತ್ತರವಿಲ್ಲ.
‘ಡ್ರಗ್ಸ್ ಮಾರಾಟ ಮತ್ತು ಖರೀದಿ ಎಷ್ಟು ವ್ಯವಸ್ಥಿತ ವಾಗಿ ಕದ್ದು-ಮುಚ್ಚಿ ನಡೆಯುತ್ತದೆ ಎಂದರೆ, ಅದರ ಕುರಿತು ಕಿಂಚಿತ್ತೂ ಸುಳಿವು ಸಿಗುವುದಿಲ್ಲ. ಪ್ರತಿ ಬಾರಿಯೂ ಮಾರಾಟದ ಸ್ವರೂಪ ಬದಲಾಗುತ್ತದೆ. ಡ್ರಗ್ಸ್ ವ್ಯವಹಾರ ಕ್ಷಿಪ್ರವಾಗಿ ನಡೆಯುತ್ತದೆ. ಎಲ್ಲಿ, ಯಾವಾಗ ಮತ್ತು ಯಾರೆಲ್ಲ ಇಂಥ ಕೃತ್ಯಗಳಲ್ಲಿ ಭಾಗಿಯಾಗಿದ್ದಾರೆ ಎಂಬುದನ್ನು ಪತ್ತೆ ಮಾಡಲು ಆಗುತ್ತಿಲ್ಲ’ ಎಂದು ಬೆಂಗಳೂರು ಸಿಸಿಬಿ ಹೆಚ್ಚುವರಿ ಕಮಿಷನರ್ ಚಂದ್ರಗುಪ್ತ ‘ಪ್ರಜಾವಾಣಿ’ಗೆ ಹೇಳಿದರು.
‘ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಆನೇಕಲ್‌ ತಾಲ್ಲೂಕಿನ ಜಿ.ಆರ್.ಫಾರ್ಮ್‌ ಹೌಸ್‌ನಲ್ಲಿ ನಡೆದಿದ್ದ ರೇವ್ ಪಾರ್ಟಿ ಮೇಲೆ ದಾಳಿ ಮಾಡಲಾಗಿತ್ತು. ಸಿನಿಮಾ ನಟ-ನಟಿಯರು ಮತ್ತಿತರರು ಪಾರ್ಟಿಯಲ್ಲಿದ್ದರು. ಕೆಲವರು ಡ್ರಗ್ಸ್ ಸೇವಿಸಿದ್ದು ಪರೀಕ್ಷೆಯಿಂದ ದೃಢಪಟ್ಟಿತ್ತು. ಡ್ರಗ್ಸ್ ಮಾರಾಟಗಾರನನ್ನೂ ಬಂಧಿಸಲಾಗಿತ್ತು. ಆತ ನೀಡಿದ್ದ ಹೇಳಿಕೆ ಆಧರಿಸಿ ತನಿಖೆ ಮುಂದುವರಿಸಿದಾಗ, ಯಾವುದೇ ಸುಳಿವು ಸಿಗಲಿಲ್ಲ. ವಿಚಾರಣೆಯಲ್ಲಿ ಆತ ಹೇಳಿದ್ದು ಸುಳ್ಳು ಎಂಬುದು ತಿಳಿಯಿತು. ಈ ಪ್ರಕರಣದ ಮೂಲದ ಬಗ್ಗೆ ಇದುವರೆಗೂ ಸುಳಿವು ಸಿಕ್ಕಿಲ್ಲ’ ಎಂದು ಅವರು ತಿಳಿಸಿದರು. ವಿದೇಶಿಯರಿಂದ ದಂಧೆ: ಆಫ್ರಿಕಾ ಖಂಡದ ವಿವಿಧ ದೇಶಗಳಿಂದ ಉದ್ಯೋಗ ಮತ್ತು ಶಿಕ್ಷಣದ ನೆಪದಲ್ಲಿ ಬೆಂಗಳೂರಿಗೆ ಬರುವ ಹಲವರು, ಡ್ರಗ್ಸ್ ದಂಧೆಯಲ್ಲಿ ತೊಡಗಿದ್ದಾರೆ. ಬಟ್ಟೆ ವ್ಯಾಪಾರದ ಸೋಗಿನಲ್ಲಿ ಸುತ್ತಾಡುವ ಇವರು, ಬಟ್ಟೆಗಳ ಜೊತೆಯಲ್ಲಿಯೇ ಸಿಂಥೆಟಿಕ್ ಡ್ರಗ್ಸ್ ಮಾರುತ್ತಾರೆ.
ಬೆಂಗಳೂರಿನ ಬಾಣಸವಾಡಿ, ಕಮ್ಮನಹಳ್ಳಿ, ರಾಮಮೂರ್ತಿ ನಗರ, ಕೆ.ಆರ್.ಪುರ ಮತ್ತು ಸುತ್ತಮುತ್ತಲ ಸ್ಥಳಗಳಲ್ಲಿ ಆಫ್ರಿಕಾ ಪ್ರಜೆಗಳು ಹೆಚ್ಚಿದ್ದಾರೆ. ಅವರಲ್ಲಿ ಬಹುತೇಕರು, ಮನೆ ಯಲ್ಲಿಯೇ ಸಿಂಥೆಟಿಕ್ ಡ್ರಗ್ಸ್ ತಯಾರಿಸುವಲ್ಲಿ ನಿಪುಣರು. ಇತ್ತೀಚೆಗೆ ಮನೆಯೊಂದರ ಮೇಲೆ ದಾಳಿ ನಡೆಸಿದಾಗ, ಡ್ರಗ್ಸ್ ತಯಾರಿಸುವ మిని ಪ್ರಯೋಗಾಲಯ ಪತ್ತೆಯಾಗಿತ್ತು.
ಹೆಚ್ಚು ಹಣ ನಿಡುವುದಾಗಿ ಮಾಲೀಕರಿಗೆ ಹೇಳಿ ಮನೆ ಅಥವಾ ಕೊಠಡಿ ಬಾಡಿಗೆ ಪಡೆಯುತ್ತಾರೆ. ಅದೇ ಮನೆಯಲಿ ಡ್ರಗ್. ಸಂಗ್ರಹಿಸಿ ಮಾರುತ್ತಾರೆ. ಹಲವು ಬಾರಿ ಜೈಲಿಗೆ ಹೋಗಿ ಬಂದರೂ ಅವರು ಡ್ರಗ್ಸ್ ಮಾರುವುದನ್ನು ಬಿಟ್ಟಿಲ್ಲ. ದೊಡ್ಡ ಪಾರ್ಟಿಗಳಿಗೂ ಡ್ರಗ್ಸ್ ಪೂರೈಸುತ್ತಾರೆ ಅವರೇ ಎನ್ನುವುದು ಪತ್ತೆಯಾಗಿದೆ.
ಸೆರೆಲ್ಯಾಕ್ ಪೊಟ್ಟಣಗಳಲ್ಲಿ ಬಚ್ಚಿಟ್ಟು ಮುಂಬೈನಿಂದ ಬೆಂಗಳೂರಿಗೆ ಸಾಗಿಸುತ್ತಿದ್ದ ಆರೋಪಿ ನೈಜೀರಿಯಾ ಚುಕ್ಕುದ್ದೀನ್, ಬೀದರ್ ತಾಲ್ಲೂಕಿನ ಭಂಗೂರ್ ಚೆಕ್‌ಪೋಸ್ಟ್ ಬಳಿ ಗಾಂಜಾ ಜೊತೆ ಸಿಕ್ಕಿಬಿದ್ದ ಓಡಿಶಾದ ನಾಲ್ವರು, ಗುಜರಾತ್‌ನ ಕರಾವಳಿ ಮೂಲಕ ಪಾಕಿಸ್ತಾನದ ಹಡಗಿನಲ್ಲಿ ಸಿಕ್ಕಿಬಿದ್ದ 13 ಆರೋಪಿಗಳ ಹಿನ್ನೆಲೆಯನ್ನು ಮಾತ್ರ ತನಿಖಾ ಸಂಸ್ಥೆಗಳು ತಿಳಿದುಕೊಂಡಿವೆ. ಅಂತರರಾಷ್ಟ್ರೀಯ ಮಟ್ಟದಿಂದ ಹಳ್ಳಿ ಹಳ್ಳಿಗೂ ಡ್ರಗ್ಸ್ ತಲುಪುತ್ತಿರುವ ಮಾರ್ಗ ಹಾಗೂ ಜಾಲದ ರೂವಾರಿಗಳ ಬಗ್ಗೆ ಮಾತ್ರ ಮಾಹಿತಿ ಸಿಕ್ಕಿಲ್ಲ. ಬೆಂಗಳೂರಿನಲ್ಲಿ ಜುಲೈ ತಿಂಗಳಲ್ಲಿ ಡ್ರಗ್ಸ್ ಪ್ರಕರಣದಲ್ಲಿ 54 ಮಂದಿಯನ್ನು ಬಂಧಿಸಿದ್ದ ಪೊಲೀಸರು, ಸಿಂಥೆಟಿಕ್ ಡ್ರಗ್ಸ್ ವಶಪಡಿಸಿಕೊಂಡಿದ್ದರು. ಆದರೆ, ನಿರೀಕ್ಷಿತ ಮಟ್ಟದಲ್ಲಿ ತನಿಖೆ ನಡೆಯಲಿಲ್ಲ. ಮಾಹಿತಿಯೂ ಸಿಗಲಿಲ್ಲ.
ಇದನ್ನೂ ಓದಿ:ವಿದ್ಯುತ್ ವಾಹನ ಕ್ಷೇತ್ರಕ್ಕಿದು ಮರುಪೂರಣದ ಸಮಯ
ಪಾಕಿಸ್ತಾನದಿಂದ ಭಾರತಕ್ಕೆ ಸಾಗಿಸುತ್ತಿದ್ದ₹ 480 ಕೋಟಿ ಮೌಲ್ಯದ ಡ್ರಗ್ಸ್ ವಶಪಡಿಸಿಕೊಂಡಿದ್ದ ಭಾರತೀಯ ಕರಾವಳಿ ಕಾವಲು ಪಡೆ (ಐಸಿಜಿ), ಗುಜರಾತ್‌ನ ಭಯೋತ್ಪಾದನಾ ನಿಗ್ರಹ ದಳ (ಎಟಿಎಸ್) ಹಾಗೂ ಎನ್‌ಸಿಬಿ ಅಧಿಕಾರಿಗಳು, ಪಾಕಿಸ್ತಾನದ ಆರು ಪ್ರಜೆಗಳನ್ನು ಬಂಧಿಸಿದ್ದರು. ಭಾರತದಲ್ಲಿ ವಿವಿಧ ರಾಜ್ಯಗಳಿಗೆ ಡ್ರಗ್ಸ್ ತಲುಪಿಸುವ ಜವಾಬ್ದಾರಿ ಇತ್ತೆಂದು ಆರೋಪಿಗಳು ಹೇಳಿದ್ದಾರೆ. ಆದರೆ, ಭಾರತದಲ್ಲಿ ಯಾರೆಲ್ಲ ಡ್ರಗ್ಸ್ ತರಿಸಿಕೊಳ್ಳುತ್ತಿದ್ದರು ಎಂಬುದರ ಬಗ್ಗೆ ಇದುವರೆಗೂ ಮಾಹಿತಿ ಲಭ್ಯವಾಗಿಲ್ಲ.
ಗುಜರಾತ್ ಹಾಗೂ ರಾಜಸ್ಥಾನದ 13 ಸ್ಥಳಗಳ ಮೇಲೆ ಎನ್‌ಸಿಬಿ ಹಾಗೂ ಎಟಿಎಸ್ ಅಧಿಕಾರಿಗಳು ಇತ್ತೀಚೆಗೆ ದಾಳಿ ಮಾಡಿದ್ದರು. ₹ 230 ಕೋಟಿ ಮೌಲ್ಯದ ಮೆಫೆಡೋನ್ ಡ್ರಗ್ಸ್ ಜಪ್ತಿ ಮಾಡಿದ್ದರು. ಇದನ್ನು ಸಿಂಥೆಟಿಕ್ ಡ್ರಗ್ಸ್ ಆಗಿ ದೇಶದ ವಿವಿಧ ರಾಜ್ಯಗಳಿಗೆ ಪೂರೈಸಲು ಆರೋಪಿಗಳು ಪ್ರಯತ್ನಿಸುತ್ತಿದ್ದರು ಎಂಬ ಮಾಹಿತಿ ಲಭ್ಯವಾಗಿತ್ತು. ಈ ಬಗ್ಗೆ ಎನ್‌ಸಿಬಿ ಅಧಿಕಾರಿ-ಯೊಬ್ಬರನ್ನು ಮಾತನಾಡಿಸಿದಾಗ, ‘ತನಿಖೆ ನಡೆಯುತ್ತಿದೆ.
ಸದ್ಯಕ್ಕೆ ಯಾವುದೇ ಮಾಹಿತಿ ನೀಡಲಾಗದು’ ಎಂದರು.
‘20210 ಜನವರಿಯಲ್ಲಿ ಕೋರಿಯರ್ ಕೇಂದ್ರವೊಂದರ ಮೇಲೆ ದಾಳಿ ಮಾಡಲಾಗಿತ್ತು. ಅಡುಗೆ ಪಾತ್ರೆಗಳಲ್ಲಿ ಬಚ್ಚಿಟ್ಟಿದ್ದ ₹ 20 ಕೋಟಿ ಮೌಲ್ಯದ ಡ್ರಗ್ಸ್ ಜಪ್ತಿ ಮಾಡಲಾಗಿತ್ತು. ಕೋರಿಯರ್ ವಿಳಾಸ ಆಧರಿಸಿ ತಮಿಳುನಾಡಿನ ಎಂ. ಮೈದೀನ್ ಹಾಗೂ ಕೆ. ಮೇರನ್‌ನನ್ನು ಬಂಧಿಸಲಾಗಿತ್ತು. ಎಲ್ಲ ರೀತಿಯಲ್ಲಿ ವಿಚಾರಣೆ ನಡೆಸಿದರೂ, ಡ್ರಗ್ಸ್ ಕಳುಹಿಸಿದ್ದ ಮೂಲ ರೂವಾರಿ ಬಗ್ಗೆ ಆರೋಪಿಗಳು ಬಾಯ್ದಿಡಲಿಲ್ಲ. ಇದರಲ್ಲಿ ಕೆಲ ವಿದೇಶಿ ಪ್ರಜೆಗಳು ಶಾಮೀಲಾಗಿರುವ ಮಾಹಿತಿಯಿತ್ತು. ಆದರೆ, ಯಾರು ಎಂಬುದು ಖಚಿತವಾಗಲಿಲ್ಲ’ ಎಂದು ತಿಳಿಸಿದರು.
ಬೆಂಗಳೂರು ಸಿಸಿಬಿ ಪೊಲೀಸ್ ಅಧಿಕಾರಿಯೊಬ್ಬರು, ‘ಡ್ರಗ್ಸ್ ಪ್ರಕರಣದಲ್ಲಿ ನೈಜೀರಿಯಾದ ಹಲವರನ್ನುಬಂಧಿಸಿದ್ದೇನೆ. ಇವರಾರೂ ಡ್ರಗ್ಸ್ ದಂಧೆಯ ಮೂಲ ರೂವಾರಿ ಹೆಸರು ಬಾಯ್ದಿಡಲಿಲ್ಲ. ವಿದೇಶದಿಂದ ಇವರು ಡ್ರಗ್ಸ್ ತರಿಸಿ ಮಾರುತ್ತಿದ್ದರು. ಆರೋಪಿಗಳ ಅಸಹಕಾರ, ಬೇರೆ ಕೆಲಸಗಳ ಒತ್ತಡ ಹಾಗೂ ಆರ್ಥಿಕ ಸಂಪನ್ಮೂಲಗಳ ಕೊರತೆಯಿಂದಾಗಿ ಅಂತರರಾಷ್ಟ್ರೀಯ ಮಟ್ಟದಲ್ಲಿ ತನಿಖೆ ನಡೆಸಲು ಸಾಧ್ಯವಾಗುತ್ತಿಲ್ಲ’ ಎಂದು ಹೇಳಿದರು.
ಮೊಬೈಲ್ ಸಂದೇಶ ಮತ್ತು ಸಾಮಾಜಿಕ ಮಾಧ್ಯಮಗಳ ಮೂಲಕ ಪೆಡ್ಡರ್‌ಗಳು, ಡ್ರಗ್ಸ್ ವಹಿವಾಟು ನಡೆಸುತ್ತಿದ್ದಾರೆ. ಒಂದು ವೇಳೆ ಆರೋಪಿ ಸಿಕ್ಕಿಬಿದ್ದರೂ ಆತ ನಿಖರ ಮಾಹಿತಿ ನೀಡುವುದಿಲ್ಲ. ಹೀಗಾಗಿ, ಬಹುತೇಕ ಸಂದರ್ಭದಲ್ಲಿ ಸಿಕ್ಕ ಆರೋಪಿಯೊಬ್ಬನನ್ನೇ ಕೇಂದ್ರೀಕರಿಸಿ ಪೊಲೀಸರು ದೋಷಾರೋಪ ಪಟ್ಟಿ ಸಲ್ಲಿಸಿ, ಕೈ ತೊಳೆದುಕೊಳ್ಳುತ್ತಾರೆ.ನೂರಾರು ಕೋಟಿ ವ್ಯವಹಾರ: ಡ್ರಗ್ಸ್
ವ್ಯಸನಿಗಳು ನಶೆಯ ಜೊತೆ ಅಪರಾಧ ಕೃತ್ಯಗಳಲ್ಲೂ ಭಾಗಿ ಆಗುತ್ತಾರೆ. ‘ಹಣ ಮತ್ತು ಡ್ರಗ್ಸ್’ಗಾಗಿ ಏನಾದರೂ ಮತ್ತು ಎಂಥದ್ದಾದರೂ ಕೆಲಸಕ್ಕೆ ಸಿದ್ಧ ಎಂಬ ಸ್ಥಿತಿಗೆ ತಲುಪುತ್ತಾರೆ. ನೈಸರ್ಗಿಕವಾಗಿ ಬೆಳೆಯುವ ಗಾಂಜಾದಿಂದ ಶುರುವಾದ ‘ಡ್ರಗ್ಸ್’ ಎಂಬ ಅಮಲೇರಿಸುವ ದಂಧೆ, ನೈಸರ್ಗಿಕ ಮತ್ತು ರಸಾಯನಿಕ ಅಂಶ ಮಿಶ್ರಣ ಮಾಡಿ ತಯಾರಿಸಿರುವ ಸಿಂಥೆಟಿಕ್ ಡ್ರಗ್ಸ್‌ವರೆಗೆ ಹೆಮ್ಮರವಾಗಿ ಬೆಳೆದಿದೆ. ವರ್ಷಕ್ಕೆ ನೂರಾರು ಕೋಟಿ ಮೌಲ್ಯದ ವಹಿವಾಟು ನಡೆಯುತ್ತದೆ.
ಉದ್ಯೋಗಿಗಳು, ವಿದ್ಯಾರ್ಥಿಗಳುಮತ್ತು ಹೆಚ್ಚಿನ ಸಂಖ್ಯೆ ವಿದ್ಯಾವಂತರೇ ಡ್ರಗ್ಸ್ ವ್ಯಸನಿಗಳು. ಬೆಂಗಳೂರು, ಮೈಸೂರು, ಮಂಗಳೂರು, ಹುಬ್ಬಳ್ಳಿ-ಧಾರವಾಡ, ಕಲಬುರಗಿ ಮುಂತಾದ ಕಡೆ ಅಪರಾಧ ಕೃತ್ಯ ಎಸಗುವವರಲ್ಲಿ ಅಂಥವರ ಸಂಖ್ಯೆಯೇ ಹೆಚ್ಚಿದೆ
ಗಾಂಜಾ ಮತ್ತು ಸಿಂಥೆಟಿಕ್ ಡ್ರಗ್ಸ್ ಮಿಶ್ರಿತ ಚಾಕೊಲೇಟ್, ಚೂಯಿಂಗ್‌ಗಮ್, ಮಾತ್ರೆಗಳು, ಸಿಹಿ ಪದಾರ್ಥಗಳು ವ್ಯಸನಿಗಳಿಗೆ ಅಲ್ಲದೇ ಯುವಜನರು-ಮಕ್ಕಳಿಗೂ ಸುಲಭವಾಗಿ ಸಿಗುತ್ತಿದೆ. ಅಪರಾಧ ಚಟುವಟಿಕೆಗೂ ಪ್ರಚೋದಿಸುತ್ತಿದೆ. ಉಡುಪಿ ಜಿಲ್ಲೆಯ ಕಾರ್ಕಳದಲ್ಲಿ ಯುವತಿಯ ಮೇಲೆ ಅತ್ಯಾಚಾರ ನಡೆಸಿದ್ದ ಆರೋಪಿ ಅಲ್ತಾಫ್, ಡ್ರಗ್ಸ್ ಸೇವಿಸಿ ಕೃತ್ಯ ಎಸಗಿದ್ದ. ಜೊತೆಗೆ, ‘ಯುವತಿಗೂ ಡ್ರಗ್ಸ್ ನೀಡಿದ್ದ’ ಎಂಬುದು ಪ್ರಾಥಮಿಕ ತನಿಖೆಯಿಂದ ಗೊತ್ತಾಗಿದೆ.
ಮಧ್ಯಮವರ್ಗದವರನ್ನು ಅದರಲ್ಲೂ ಯುವ ಜನರನ್ನು ಪರಿಚಯಿಸಿಕೊಳ್ಳುವ ಡ್ರಗ್ಸ್ ಪೂರೈಕೆದಾರರುಮತ್ತು ಮಾರಾಟಗಾರರು ನಿಧಾನವಾಗಿ ಸ್ನೇಹದಿಂದ ಸಲಿಗೆ ಬೆಳೆಸಿಕೊಳ್ಳುತ್ತಾರೆ. ಕ್ರಮೇಣ ಡ್ರಗ್ಸ್ ಸೇವನೆ ಚಟ ಹಚ್ಚುತ್ತಾರೆ. ಒಂದು ದಿನ ಅದರ ಸೇವನೆ ಬಿಟ್ಟರೂ ಚಡಪಡಿಸುವ ಸ್ಥಿತಿಗೆ ತರುತ್ತಾರೆ. ‘ಹಣ ನೀಡಿದರಷ್ಟೇ ಸಿಗುತ್ತದೆ’ ಎಂಬ ಸ್ಥಿತಿ ನಿರ್ಮಿಸುತ್ತಾರೆ. ನಂತರ ಅವರನ್ನೇ ಮದ್ಯವ್ಯಸನಿ ಆಗಿಸಿ, ಮಾರಾಟಗಾರರಾಗಿ ಪರಿವರ್ತಿಸುತ್ತಾರೆ. ಬಹುತೇಕ ಸಂದರ್ಭಗಳಲ್ಲಿ ಹೊಸ ಮಾರಾಟಗಾರರು ಪೊಲೀಸರ ಬಲೆಗೆ ಬೀಳುತ್ತಾರೆ. ಆದರೆ, ಅದೇ ದಂಧೆಯಲ್ಲಿ ಪಳಗಿದವರ ಚಹರೆ ಮತ್ತು ಹೆಸರಿನ ಸುಳಿವು ಸಿಗುವುದಿಲ್ಲ.
ಈ ಜಾಲ ಹೀಗೆ ವ್ಯಾಪಿಸಲು ಪೊಲೀಸರದ್ದು ಸೇರಿ ಕೆಲ ಇಲಾಖೆಗಳ ‘ಕೈವಾಡ’ವೂ ಇದೆ. ಪೊಲೀಸ್, ಅರಣ್ಯ, ಅಬಕಾರಿ, ಸಾರಿಗೆ ಇಲಾಖೆಯ ಕೆಲ ಅಧಿಕಾರಿಗಳು ಮತ್ತು ಸಿಬ್ಬಂದಿ ಹಲವು ವರ್ಷಗಳಿಂದ ಒಂದೇ ಸ್ಥಳದಲ್ಲಿದ್ದಾರೆ. ವಾಹನ ಚಾಲಕರೂ ವರ್ಗಾವಣೆ ಆಗುವುದು ಕಡಿಮೆ. ಆ ಅಧಿಕಾರಿಗಳು ಮತ್ತು ಸಿಬ್ಬಂದಿ ಡ್ರಗ್ಸ್ ಜಾಲಕ್ಕೆ ಕೊಂಚ ನಿಕಟವಾಗಿದ್ದಾರೆ. ‘ಕಾರ್ಯಾಚರಣೆಯ ಸುಳಿವು ಸಿಕ್ಕ ಕೂಡಲೇ ಆಯಾ ಇಲಾಖೆಯ ಕೆಲ ವಾಹನ ಚಾಲಕರೇ, ಆರೋಪಿಗಳಿಗೆ ಸುಳಿವು ನೀಡಿ, ಪರಾರಿಯಾಗಲು ಸಹಕ-ರಿಸುತ್ತಾರೆ’ ಎಂದು ಪೊಲೀಸ್ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದರು.
ಕೋಡ್ ಬಳಸಿ ಡ್ರಗ್ಸ್ ಮಾರಾಟ: ಡ್ರಗ್ಸ್ ಮಾರಾಟ ಕೂಡ ಸುಲಭದ ಸಂಗತಿಯಲ್ಲ. ಯಾರಾದರೂ ಹೊಸಬರು ನೇರವಾಗಿ ಬಂದು ಕೇಳಿದರೆ, ಡ್ರಗ್ಸ್ ಕೊಡುವುದಿಲ್ಲ. ಪರಿಚಯಸ್ಥರು ಅಥವಾ ಕಾಯಂ ಗ್ರಾಹಕರ ಮೂಲಕವೇ ಡ್ರಗ್ಸ್ ಮಾರಾಟಗಾರನನ್ನು ಸಂಪರ್ಕಿಸಬೇಕು. ಬಹುತೇಕ ಉಪ ಪೆಡ್ಡರ್‌ಗಳು ತಮ್ಮದೇ ಕೋಡ್ ಮತ್ತು ಸಂಜ್ಞೆ ಭಾಷೆಯಲ್ಲಿ ವ್ಯವಹರಿಸುತ್ತಾರೆ.ಉಪ ಪೆಡ್ಲರ್‌ಗಳಿಗೆ ತಮ್ಮದೇ ಗ್ರಾಹಕರ ಬಳಗವಿದೆ. ಆರ್ಡರ್ ಬಂದ ಕೂಡಲೇ ಪೊಟ್ಟಣ ರೂಪದಲ್ಲಿ ಡ್ರಗ್ಸ್ ಇಟ್ಟು ತಲುಪಿಸಲಾಗುತ್ತದೆ. ಆಹಾರ ಪೂರೈಕೆ ಕಂಪನಿಯ ಕೆಲ ಡೆಲಿವರಿ ಬಾಯ್‌ಗಳೂ ಈ ಕೆಲಸದಲ್ಲಿ ತೊಡಗಿದ್ದಾರೆ. ಪೊಲೀಸ್ ಕಾರ್ಯಾಚರಣೆ ಸುಳಿವು ಸಿಕ್ಕರೆ, ಬೇರೆಯದ್ದೇ ತಂತ್ರಗಾರಿಕೆ ಅನುಸರಿಸುತ್ತಾರೆ. ನಿರ್ಜನ ಪ್ರದೇಶದಲ್ಲಿ ಡ್ರಗ್ಸ್ ಇಟ್ಟು, ಅದರ ಗೂಗಲ್ ಮ್ಯಾಪ್ ಲೊಕೇಶನ್ ವಾಟ್ಸ್ಆ್ಯಪ್‌ನಲ್ಲಿ ಕಳುಹಿಸುತ್ತಾರೆ ಎಂದು ಪೊಲೀಸ್ ಅಧಿ ಕಾರಿಯೊಬ್ಬರು ತಿಳಿಸಿದರು.
ಕೆಲ ಡ್ರಗ್ಸ್ ಮಾರಾಟಗಾರರು, ಮೊಬೈಲ್ ಆ್ಯಪ್ ಅಭಿವೃದ್ಧಿಪಡಿಸಿ ಅದರ ಮೂಲಕ ಗ್ರಾಹಕರನ್ನು ಸಂಪರ್ಕಿಸಿ ಡ್ರಗ್ಸ್ ಮಾರುತ್ತಾರೆ. ಮನೆಗಳಿಗೆ ಕೊರಿಯರ್ ಮೂಲಕ ತಲುಪಿಸುತ್ತಾರೆ. ವಿದೇಶದಲ್ಲಿರುವ ಸಾಫ್ಟ್‌ವೇರ್ ಎಂಜಿನಿಯರ್ ನೆರವಿನಿಂದ ಆ್ಯಪ್ ಮಾಡಿಸುವ ಆರೋಪಿಗಳು, ಸಾಮಾಜಿಕ ಮಾಧ್ಯಮಗಳ ಮೂಲಕ ಅದನ್ನು ಪ್ರಚಾರ ಮಾಡುತ್ತಾರೆ. ಅದನ್ನು ಇನ್‌ಸ್ಟಾಲ್ ಮಾಡಿಕೊಳ್ಳುವ ಗ್ರಾಹಕರು, ಅದರ ಮೂಲಕವೇ ಆರ್ಡರ್ ನೀಡುತ್ತಾರೆ. ಇದಾದ ನಂತರ, ಗ್ರಾಹಕರಿಗೆ ಪಾರ್ಸೆಲ್‌ ತಲುಪುತ್ತದೆ.
‘ಪೊಲೀಸರ ದಾಳಿ; ಗಾಂಜಾ ಮತ್ತು ಸಿಂಥೆಟಿಕ್ ಡ್ರಗ್ಸ್ ಜಪ್ತಿ’ ಎಂಬ ಸುದ್ದಿ ಪತ್ರಿಕೆಗಳಲ್ಲಿ ಆಗಾಗ ಕಾಣಿಸಿಕೊಳ್ಳುತ್ತದೆ. ಇದರ ಜಾಡು ಹಿಡಿದು ಹೊರಟರೆ, ಡ್ರಗ್ಸ್ ಮಾರಾಟಗಾರರು ಸಿಕ್ಕಿಬೀಳುತ್ತಾರೆ ಹೊರತು ಅದನ್ನು ಪೂರೈಸಿದವರು ಮತ್ತು ತಯಾರಿಸಿದವರು ಸಿಕ್ಕಿಬೀಳಲ್ಲ. ಕೆಳ ಮಟ್ಟದ ಮಾರಾಟಗಾರರನ್ನು ಹಿಡಿಯುವ ಪೊಲೀಸರಿಗೆ, ಜಾಲವನ್ನು ಪತ್ತೆ ಮಾಡಿ ಬುಡ ಸಮೇತ ಕೀಳಲು ಸಾಧ್ಯವಾಗುತ್ತಿಲ್ಲ.